محمد صلاح و قوة مصر الناعمة | بقلم ا.محمدحافظ

محمد صلاح تخطى مرحلة نجم الكرة أو النجم الرياضي اللامع من زمان .. وتحول لأحد دعائم وأسلحة قوة مصر الناعمة اللي بتخليها ذات نفوذ سياسي وثقافي في محيطها ..يعني زيه زي طه حسين  ومجيد يعقوب وأم كلثوم وعبد الوهاب ونجيب محفوظ  وتوفيق الحكيم وعباس العقاد وعبد الحليم حافظ وغيرهم من عشرات الرموز الكبيرة اللي لمعت في سماء مصر في مجالات عديدة وامتدت تأثيراتها للسماوات والفضاءات العربية والعالمية واللي كل منهم بقى رصيد كبير بيزيد من تأثير ونفوذ مصر الثقافي والاجتماعي والفني بل والسياسي في محيطها الاقليمي .

والكلام ده مش مبالغة ولا من قبيل نشوة الافتخار، ولكنه حقيقة دامغة بكل تواضع ، وهثبت لكم :

■ مين في قارة أوروبا النهاردة ميعرفش محمد صلاح ؟ مين من الأطفال والمراهقين والشباب المصري والعربي بل وعلى مستوى العالم مش بيعرف محمد صلاح وبيحبه وبيحاول يقلده في كل حاجة بيعملها ؟

■ مين اتعملتله أغاني وأناشيد مخصوص وبقت صورته بتترسم على الحيطان والمعالم الشهيرة في كل شوارع انجلترا وأوروبا كلها ؟ أوروبا اللي أغلب سكانها ما يعرفوش عن مصر والشرق الأوسط سوى انها منطقة خراب وحروب ونزاعات و تصدير للتطرف والارهاب ، النهاردة بدأت تتعرف علينا بطريقة جديدة ومن زاوية مختلفة عن طريق محمد صلاح

■ دا فيه أطفال بريطانيين بقوا بيسجدوا على الأرض تقليدا لمحمد صلاح برغم انهم مش عارفين هو بيعمل كده ليه ، لأنهم مش مسلمين

■ مش هنسى أبدا احد التعليقات اللي كتبها واحد من الانجليز - المشهورين بعنصريتهم - اعجابا بمحمد صلاح ، والتعليق رغم ما فيه من عبارات الاعجاب والاشادة إلا أنه يحمل في طياته وبين سطوره شعورا واضحا بالغل والضغينة والخوف اللي بيصل لمرحلة الرعب من تأثير محمد صلاح ؛ ذلك الفتى المصري العربي الأسمر على المجتمع البريطاني

التعليق بيقول فيه المواطن الانجليزي لمحمد صلاح :

• أما آن لك أن تتوقف عما تفعله احترامًا لتاريخ من سبقوك ؟

• أما يكفيك أن تقضى على العنصرية ضد العرب ؟

• أتظن أن أقدامك على الأرض تزلزل قلوب المدافعين وحراس المرمي وحدهم ؟

• الأمر ليس هكذا يا فتى ..

• أنت تعصف بكيان دولة كاملة ..

• تغنوا بأسمك فى موسمك الأول ، ولم تكتف ..

• حملوا بسببك أعلام الدولة المصرية ، فلم تتوقف ..

• رسموا ابتسامتك البريئة على جدران منازلهم ، فما ارتضيت ..

• والآن ..إلى أين انت ذاهب بهم ؟!!

• ألا تعلم أنك أقوي إعصار عاطفي مر على أمة ليفربول ؟

• أتظن أنه من السهل أن تعبث بأرقام نُقشت بالدماء على قلاع الأنفيلد الحصينة ؟

• قلتها لك وسأكررها عليك مرة أخرى ..

• أنت قررت أن تعاقب بريطانيا على احتلالها لبلادك ..

• ونجحت فى أن تحتل دولةً كاملةً وحدك ..

• وليتك استعمرت أراضيهم فقط ..

• ولكنك أستعمرت قلوبهم وعقولهم وحناجرهم التي تهتف لك ..

و مع ذلك لم تكتفِ .. (انتهى كلام البريطاني)
.
● عرفتوا بقى اننا ماكوناش بنبالغ في كلامنا عن النجم الأسطوري وتأثيره الطاغي ؟
.
● بس لازم نخلّي بالنا ان محمد صلاح وصل للمرحلة دي من العالمية وقدر يغزو القلوب قبل العقول مش بتفوقه ومهاراته الرياضية فقط ، ولكن برقي أخلاقه وتواضعه ووطنيته واخلاصه ، وباعتزازه بمصريته وبارتباطه بجذوره وبعدم التنكر لأصله الريفي ، وده اللي بيأكدلنا دايما ان البطل الأسطوري مش بيكون فقط متميز في مجاله  سواء رياضي أو فني أو ثقافي أو عسكري ، ولكنه شخصية شاملة متميزة في كل جوانب الحياة ، وعشان كده بيكون شخصية محورية ملهمة للملايين من البشر في كل أرجاء المعمورة ..

#ربنا_يحميك_يابني ❤️
#mo_salah
#the_Egyptian_king
.